ကို (သို့မဟုတ်) ကျမထံပျံလာသောတောင်ပံမဲ့လိပ်ပြာ - ၃

ကျမကိုယ်ကျမ ဘယ်လို မိန်းမလဲလို့ တခါတခါ တွေးသည်။ ကိုနဲ့ ခပ်ဆင်ဆင်တူသောသူများကို လိုက်ပြီး ရည်းစားထားတတ်နေသည်။ ငယ်တုန်းက သာမန်ရည်းစားအဆင့်၊ အခု အသက်က သုံးဆယ်ကျော်လာတော့ တူတူအိပ်သည့်အဆင့်ပါ ပါလာသည်။ ဒါကိုလည်း ငါမိန်းကလေးပဲ ထိခိုက်တယ်ဘာညာ မတွေးတတ်ခဲ့။ လူတစ်ယောက်ဟာ ကျမရည်းစားဖြစ်ဖို့ အဓိက ကိုနဲ့တူနေဖို့လိုအပ်သည်။ ဒါကြောင့်လည်း ကျမရည်းစားများသည် ရုပ်ရည်ခပ်ဆင်ဆင်များသာ ဖြစ်ကြသည်။

အချစ်ဆိုတာဘာလဲ။ ကျမမသိပါ။ ကျမသိသည်မှာ ကိုသာဖြစ်သည်။ ကို့အပေါ်ထားသော ကျမစိတ်စေတသိတ်သည် အချစ်ဖြစ်ချင်ဖြစ်မည် ဖြစ်ချင်မှလည်း ဖြစ်မည်။ သို့သော် ကျမသည် ကိုကလွဲပြီး တခြားအရာကို မသိတတ်ခဲ့။ ကိုမှတပါး ကျမစိတ်ဝင်စားစရာ မရှိခဲ့။ လူတစ်ယောက်ကို နှစ်နှစ်ကာကာ ချစ်မိမလိုဖြစ်တိုင်း ငါတော့ ကို့လောင်းရိပ်အောက်က ရုန်းထွက်ပြီး ဒီလူတစ်ယောက်ကိုတော့ဖြင့် ကိုနဲ့ မပတ်သက်ဘဲ ချစ်တော့မည်ဟု အကြိမ်ကြိမ် ကြိုးစားသော်လည်း ကိုကသာ ကျမဘ၀ကို ပဲ့ကိုင်နေဆဲ။

ယောက်ျားတစ်ယောက်ကို ဖြတ်ပစ်ဖို့အတွက် ဘာအကြောင်းပြချက်မှ ကျမပေးလေ့ မရှိ။ အကြောင်းပြချက်လည်း ကျမမှာ မရှိချေ။ တိခနဲ့ ဘာအဆက်သွယ်မှမလုပ်ဘဲ ဖြတ်ပစ်တတ်သည်။ အဖြတ်ခံရတဲ့လူက ငါအဖြတ်ခံလိုက်ရပြီဆိုတာတောင် သိလိုက်မှာ မဟုတ်။ လူတစ်ယောက်ကို ဘယ်လောက်ပဲ နှစ်နှစ်ကာကာ ချစ်တော့မယ်လို့ ဆုံးဖြတ်ဆုံးဖြတ် တစုံတရာသော အနေအထားမှာ ကျမဆက်ချစ်မရတော့။ ဆက်ခံစားလို့ မရတော့။ ဆက်ပြီး အပျော်သဘောတောင် တွဲမရတော့။ အပြစ်လေး တစ်ခုလောက် မဆိုစလောက်ကလေး လုပ်ကြည့် ကျမက လုံးဝကြည့်မရတော့။ ခွင့်လွှတ်ဖို့ မတွေးတော့။ ချစ်ကြတုန်းက တကယ် စိတ်ရောကိုယ်ရော နှစ်ပြီး ချစ်ခဲ့သလောက် ကျမဖြတ်ပစ်တတ်သည်။ တခါတလေများ ဘာအပြစ်မှ မရှိဘဲ အပြစ်ကို လိုက်ရှာပြီးမဖြစ်ဖြစ်အောင် ပြသနာလုပ်ပြီးတော့ကို ဖြတ်ပစ်ဖူးသည်။ ကိုသည် ကျမကို ကျိန်စာများ တိုက်ခဲ့လေသလား။ ကိုသည် ကျမကို ပျော်ပျော်ရွှင်ရွှင်မနေရအောင် အချစ်ဆိုတာ တစ်ခုအတွက် အမြဲ စိတ်ရှုပ်နေရအောင် ပြုစားခဲ့လေသလား။

ကျမစိတ်သည်ဆန်းကြယ်လှသည်။ အခုပဲ လူတစ်ယောက်ကို သေမလိုချစ်နေရင်းက ကိုဆိုတာ ၀င်လာတာနဲ့ ချက်ချင်းပဲ မချစ်တော့ဘူး၊ ငါချစ်တာ သူမဟုတ်ဘူးစသည်ဖြင့် ပြောင်းသွားတတ်သည်။ ထိုနေရာမှာ နောက်တစ်ယောက်ဆိုတာ ရှိလာဖို့တော့လည်း မလိုအပ်လှ။ ကျမအတွက် ကိုကသာ အချိန်ပြည့်ရှိနေသည်။ ကိုသည် ဆယ့်ကိုးနှစ်သမီးကျမကို ဆယ်စုနှစ်တစ်ခုကျော်အောင်ထိ စိုးမိုးနေဆဲ။ တခါတလေ စဉ်းစားသည်။ ကိုနဲ့သာ အဆင်ပြေပြေ သာယာတဲ့ ဘ၀တစ်ခုကို ခဏတာဖြစ်ဖြစ် တည်ဆောက်ခွင့်ရခဲ့မယ်ဆိုရင် ခုလောက်ထိ ကို့အပေါ်စွဲလမ်းစိတ် ရှိပါ့မလားဆိုတာပါပဲ။ အဲဒါအတော်တော့ စိတ်ဝင်စားစရာကောင်းသည်။ ကို့ဇာတ်လမ်းသည် ဘယ်လိုမဆို ကျမရင်ထဲမှာ ရှိနေပေမဲ့ အပြင်မှာတော့သိမ်းသွားခဲ့ပြီ။ ဆက်ကလို့ မရနိုင်တော့။ ဒီတော့ တွယ်ငြိမှုတစ်ခုမှာ အဆုံးသတ်သွားခဲ့သည်။ အဲဒီတွယ်ငြိမှု ကိုချေဖျက်ဖို့ အခြေအနေ မပေးခဲ့တော့ချေ။ တကယ်တမ်း ဆက်ပြီး ကိုနဲ့ တွဲဖြစ်ကြမယ် တွေ့ဖြစ်ကြမယ်ဆိုရင် ကို့ကို ဒီလောက်ထိ ဆက်ပြီး စွဲလမ်းနေပါ့မလားဆိုတာ တစ်ခုက အတော်ကို စိတ်ဝင်စားစရာ ကောင်းသည်။ ကျမကိုယ်တိုင်လည်း သိချင်လှသည်။

ကျမသည် ကိုဟု ကျမ အတင်းလုပ်ခေါ်ထားသော ကိုမဟုတ်သည့် ကို့နှတ်ခမ်းများကိုငေးကြည့်နေမိသည်။ ကို့နှတ်ခမ်းလေးများသည် ကို့နှတ်ခမ်းများနှင့်တူလွန်းသည်။
“ဘာလို့ နှတ်ခမ်းတွေကို အဲလောက်တောင် စိုက်ကြည့်နေရတာလဲ ချစ်ရဲ့”
“ချစ်လို့”
ကျမသည် ပင်ကိုယ်အားဖြင့် မူယာမာယာ များသူဖြစ်နေသည်။ လူတစ်ယောက်ကို တည်တည်ငြိမ်ငြိမ်နဲ့ လှည့်စားတတ်အောင်လည်း အကျင့်က ရခဲ့ပြီ။ ရွဲ့တတ်သော အကျင့်ကလည်း ရခဲ့ပြီ။ ကျမစိတ်ထဲမှာ ရည်းစားတစ်ခါထားတိုင်း တစ်ခါပြတ်တိုင်း ငါကို့ကို ရွဲ့နေတာလို့ယူဆသည်။ ကိုသိရင် စိတ်ချမ်းသာမှာ မဟုတ်လို့တွေးပြီး ကျေနပ်သည်။ ကို့ကြောင့် ကျမဒီလို ဖြစ်နေတာကို ကိုသာသိရင် ရင်ကွဲမှာ စသဖြင့် လိုရာတွေးပြီး ကြည်နူးနေသည်။ တကယ်တမ်း အသိစိတ်နဲ့ ယှဉ်ပြီး စဉ်းစားရင် ကျမကသာ ကို့ကို စွဲလမ်းနေသလောက် ကိုကတော့ ကျမကို သတိတောင် ရတော့မှာ မဟုတ်ဘူးလို့ မသိမဟုတ် သိသည်။ သိလျက်နှင့်ပင် ကိုက ကျမကို ချစ်ပါတယ်လေ အခြေအနေ အကြောင်းကြောင်းကြောင့် ထားခဲ့တာပါ ဆိုတာမျိုး နဲ့ဖြေသိမ့်နေတတ်ပြန်သည်။

မိန်းမတစ်ယောက်က ယောက်ျားတစ်ယောက်ကို မေ့လို့မရ နာကျည်းလို့ မရတဲ့ အဓိက အကြောင်းအရင်းသည် ထိုယောက်ျားက ချစ်တယ်လို့ ယုံကြည်နေစိတ်ကြောင့်ဖြစ်သည်။ သူချစ်ပါတယ်လေ လို့ထင်နေသရွေ့ ယူဆနေသရွေ့ ထိုယောက်ျားကို စိတ်နာလို့ မရတတ်။ အထူးသဖြင့် အနုပညာဘက်ကို အားသန်သော မိန်းမများက ပိုဆိုးသည်။ စာတစ်ပုဒ် ကဗျာတစ်ပုဒ်ဟာ စိတ်ထဲက ခံစားချက် အရင်းခံမရှိဘဲ မဖြစ်လာနိုင်လို့ ယူဆထားတတ်သော မိန်းမများက အဆိုးဆုံးဖြစ်သည်။ ကိုယ်တိုင်ရေးလိုက်တဲ့ အခါ တခါတလေ ဘာရယ်မဟုတ် အငှားခံစားပြီး ရေးတတ်ပေမဲ့ ကိုယ့်အတွက် ရေးပေးခဲ့သော ကဗျာတို့ကိုကား အမှန်လို့ပင် ဇွတ်မှိတ်ယုံပစ်တတ်သည်။ တကယ်တော့ ရေးတဲ့လူကလည်း ရေးနေတုန်းက တကယ် ခံစားချက်နဲ့ ရေးခဲ့ပေမဲ့ နောင်တစ်ချိန်ထိ အဲဒီခံစားချက်က ဆက်ရှိနေမယ်လို့ ဘယ်ပြောလို့ရပါ့မလဲ။

တကယ်တော့ ကျမသည် ဘုန်းကြီးတစ္ဆေဖြစ်သည်။ အရာရာကို မချင့်ချိန်တတ်တာလည်း မဟုတ်။ အမှန်အတိုင်း မဝေခွဲတတ်တာလည်း မဟုတ်။ ဒါပေမဲ့ ကိုဆိုတာတစ်ခုကို ကျမဘက်ကကို သာယာပြီး အသက်သွင်းနေတတ်သည်။ ကိုနဲ့ ဝေးကွာခဲ့ရသော နာကျင်မှု၊ ကို့အပေါ်အခုထိ စွဲလမ်းတမ်းတနေမှု၊ ကို့အတွက် ဖြစ်ပေါ်လာသော ရင်ကွဲမှုတွေကို သာယာနေသည်။ တကယ်ဆို ဆယ်နှစ်ကျော်ကြာသွားတဲ့အခါ ဝေဒနာသည် ဘယ်လောက်မှ မဆိုသာတော့။ ဒါကိုပဲ ပျောက်ပျက်သွားမှာ စိုးနေတတ်သည်။ တခြားရည်းစားတွေ ဆက်ထားပြီး ဖြတ်လိုက်ရလို့ ရင်ကွဲမတတ်ခံစားရတာတွေကိုပါ ကို့အပေါ်ထပ်ဖြည့်ခံစားသည်။ အသည်းကွဲနေရတာကို ကျမစွဲလမ်းနေသည်။ ကျမသည် ဆယ်ကျော်သက်က အသည်းကွဲတာကို ကုစားဖို့ မကြိုးစားရုံအပြင် အသက်သုံးဆယ်ကျော်သည်အထိ ဆွဲခေါ်လာသည်။ ကျမဘ၀ကို အနစ်မွန်းခံပြီး အသည်းကွဲမှုတစ်ခုကို သာယာသည်။

တစ်စုံတစ်ယောက်က လက်ထပ်ဖို့ ဘာညာ အတည်တကျ အမြတ်တနိုးရှိလာခဲ့လျင် ကျမလည်း လိုလားပါသည်။ အထူးသဖြင့် အသက်အစိတ်ကျော်လာတော့ အိမ်ထောင်နဲ့ ကလေးတွေနဲ့ အတည်တကျ နေလိုစိတ် ဖြစ်ခဲ့သည်။ သို့သော် သုံးလေးနှစ်တူတူနေခဲ့သော ယောက်ျားတစ်ယောက်ကို ရက်ရက်စက်စက်ကျမဖြတ်ပစ်သည်။ သူကတော့ ဘာကြောင့်ဖြတ်တယ် ညာကြောင့်ဖြတ်တယ်ဆိုတဲ့ အတွေးမျိုးစုံတွေးကောင်းတွေးမည်။ ကျမကတော့ သူ့ချစ်ခြင်းအပေါ် ပျော်ဝင်မလို ဖြစ်နေချိန်မှာ ကျမသူ့ကို ချစ်ခဲ့တာ ကို့ကို ရွဲ့နေတာလေဆိုတာမျိုးကို ကိုနဲ့စတွေ့တဲ့ ဆယ့်တစ်နှစ်ပြည့်နေ့လေးမှာ သတိရလိုက်တာ ဖြစ်သည်။ တကယ် မချစ်ခဲ့ဘူးလားဆိုတော့လည်း မဟုတ်။ ချစ်ကြတုန်းက ကျမကိုယ်တိုင် ပျော်ဝင်ပြီး ချစ်တာ။ ကျမကိုယ်တိုင် သူသာမက သူ့မိသားစု၊ သူ့ညီမ၊ သူ့ဝမ်းကွဲတွေ အစစအရာရာနဲ့ ရင်းနှီးပတ်သက်ပြီးတော့ ချစ်တာဖြစ်သည်။ အများက အားကျတဲ့ သာယာတဲ့ အိမ်ထောင်တစ်ခုကိုလည်း ကျမပိုင်ဆိုင်ခဲ့သည်။

တကယ်တော့ အဲလောက်ထိ မဖြစ်သင့်ဘူးမဟုတ်လား။ ကိုဆိုတဲ့ ဆယ့်ကိုးနှစ်က စွဲလမ်းခဲ့တဲ့ ယောက်ျားတစ်ယောက်၊ အခုချိန်မှာ အသက်လေးဆယ်ကျော်နေမည့် ယောက်ျားတစ်ယောက်၊ ကျမနဲ့လည်း အသက်ရှင်နေလျက်၊ သူ့အသိုင်းအ၀ိုင်း၊ ကိုယ့်အသိုင်းအ၀ိုင်း တူနေပေမဲ့ အဆက်သွယ်မရှိတဲ့ ယောက်ျားတစ်ယောက် ကိုရွဲ့တယ်ဆိုတဲ့ အကြောင်းပြချက်နဲ့၊ ဆက်ချစ်တယ်ဆိုတဲ့ အကြောင်းပြချက်နဲ့တော့ သာယာနေတဲ့ ဘ၀လေး တစ်ခုကို ဖြေဖျက်နိုင်လောက်အောင် ရက်စက်သော ကျမကိုယ်ကျမအံ့သြသည်။ ဒါဟာ တစ်ယောက်နဲ့ တစ်ယောက် လင်မယား သမီးရည်းစားလိုထက် သားမိလို မျိုးရင်းနှီးသွားလို့လားဆိုတာ တွေးမိသည်။ ဒီတော့ နောက်တစ်ယောက် (ဆိုပါတော့ ကိုနဲ့ ခပ်ဆင်ဆင်တူသော နောက်တစ်ယောက်) ကို ကျမကိုလို့ပဲ ခေါ်သည်။ အတင်းခေါ်သည်။ ကိုမဟုတ်သော ကိုသည် ကျမက ကိုလို့ ခေါ်တာကို သိပ်မကြိုက်လှ။

“မောင်လို့ ခေါ်တာလေးတစ်ခုကို သိပ်စွဲလမ်းခဲ့တာ ငယ်ငယ်တုန်းကပေါ့”
“မခေါ်ချင်ပါဘူး ကလေးကလား၊ ကိုဆိုတာလေးက ယဉ်တယ် သိမ်မွေ့တယ် လူကြားထဲလည်း ခေါ်ဖို့ တင့်တယ်တယ် နောက်နောင် ကလေးတွေ မွေးလာရင် ကလေးတွေ ရှေ့လည်း ခေါ်ဖို့တင့်တယ်တယ်”
ကျမသည် တကယ် တစ်ဘ၀လုံးစာ ရည်ရွယ်ထားသလို စကားတွေ ပြောနေမိသည်။ အချိန်ပြည့် ကိုမဟုတ်သော ကို့ကို အချိန်ပေးသည်။ အစစအရာရာ ကို့အတွက် စိတ်ရောကိုယ်ပါ မြှုပ်နှံပြီး ပူပင်သည်။ ကို့အလိုကို သိပ်လိုက်သည်။ ကို့လိုပဲ မိန်းမပွေတတ်သော ကိုသည် ကျမအတွက် တကယ့်ကို အတိုင်းပင်ဖြစ်နေသည်။ နောက်ပြီးတော့ ကိုသည် ကို့လိုပင် ပွေတယ်လို့ ပြောတာ မကြိုက် စွံတာတဲ့။ ဟုတ်မှာပါ။ စွံတာပါ။ မိန်းမတွေက စွဲလမ်းကြတာ။ ကျမက ကို့ကို စွဲသလိုမျိုးဆို ကိုကျမနဲ့ ပွေခဲ့လို့မှ မဟုတ်တာ။ ကိုကလည်း သူ့အရှုပ်တွေထဲ ငယ်ရွယ်လွန်းတဲ့ ကျမကို ဆွဲမသွင်းချင်လို့ ကျမကို ရင်နာနာနဲ့ ထားခဲ့တာ မဟုတ်လား။

လိုရာဆွဲပြီး ပျော်မွေ့တတ်သောအကျင့်တစ်ခု ကျမဆီမှာ ပျောက်မသွားသေး။ ကိုသည် ကျမကိုတောင်းပန်သော အကြည့်မျိုးကြည့်သည်။
“မင်းကိုကိုယ်အရင်က ဆိုးခဲ့တာတွေ အတွက် မင်းစိတ်ထဲ အငြိုးမထားနဲ့နော် ကိုယ့်စိတ်က ပါလို့ ဆိုးတာ မဟုတ်ပါဘူး။ ”
ကျမသည် ကို့ကို သနားလာသည်။ ကျမဘ၀မှာ ကိုတစ်ယောက်ပဲ ရှိတော့မှာပါလေ။ ကိုက အသက်ပြန်ဝင်လာတာပဲ၊ ကိုက ပြန်လာပြီး ကျမကို တောင်းပန်နေတာ။ ကျမသည် ကို့ကို ကိုလို့ပင် ယူဆလိုက်သည်။ ကိုနဲ့ တူတူနေတဲ့ သုံးလေးရက်က ကျမဘ၀အတွက် အပျော်ဆုံး အချိန်တွေပါပဲ။ အတိတ်က ကျိန်စာတွေ အကုန်လုံးကို ကိုက ချေဖျက်လိုက်သလိုလည်း ခံစားရသည်။ ဒီတစ်ဘ၀စာ ဒီယောက်ျားတစ်ယောက်ကို ကောင်းကောင်းဆိုးဆိုး ချစ်တော့မယ်လို့ စိတ်က ဆုံးဖြတ်သည်။ ကျမရင်ခွင်ထဲ အိပ်နေရင် ကိုဟာ တကယ် ကိုဖြစ်သွားတာပါပဲ။ ကျမဆီပြန်လာတာ။ ကိုကျမဆီတကယ် ပြန်လာတာ။ တစ်ခုပဲ စိတ်ပူတာ ဒီယောက်ျားတစ်ယောက်သည် ကို့ကိုလုံးဝ မေ့ပစ်နိုင်အောင် ကုစားပေးမလား။ အချိန်ရော ဘယ်လောက် ယူမလဲ။


ခိုင်စိုးလင်း
14-11-2009 (12:22)